Mangir kunungar stridu agutland mithan hathit war. thau hieldu gutar e iemlica sithri Oc ret sinum. Sithan sentu gutar sendumen manga tjl suiarikis En engin thaira fic frith gart fyr than awair strabain af alfha socn hann gierthi fyrsti frith withr suja kunung.
tha en gutar hann til bathu at fara. tha suarathi hann. Mik witin ir nu faigastan oc fallastan giefin tha mir en ir wilin et iec fari innan slikan watha thry wereldi. att mir sielfum. annat burnum synj minum. Oc thrithia cunu. thy et hann war senieldr. Oc fiel kunnungur so sum saghur af ganga gicc hann a staggathan ret withr suia kunung. Siextighi marca silfs vm arr huert. thet ier scattr guta so at suiarikis cunungr fiauratighi marcr silfs af thaim siextighi. En ierl hafi tiughu marcr silfs. thinna stathgath gierthi hann mith lanz rathj. fyr en hann haiman fori.
So gingu gutar sielfs wiliandi vndir suia kunung thy at thair mattin frir Oc frelsir sykia gutland firir vtan cornband eller annur forbuth.
hegnan oc hielp sculdi kunungr gutum at waita. En thair withr
thorftin. oc kallathin. sendimen al oc kunungur oc ierl samulaith a
gutnal thing senda. Oc latta thar taka scatt sinn. thair sendibuthar
aighu frith lysa gutum alla stethi til sykia yfir haf sum upsala
kunungi til hoyrir. Oc so thair sum than wegin aigu hinget sykia
